عائلات يافا مطاحن أخوان دولة من عائلات يافا القديمة منذ العهد العثماني

 ما كان في تفاهمات او اتفاقيات مع اليهود لأنه أيامها مكانوش اليهود دوله منظمه، كانوا عصابات هجانا، كان كله هجانا، والهجانا عصابات، يعني مكانوش يكترثوا بالقوانين وما قوانين، كانوا يؤتلوا ويدبحوا ومحدش يؤللهم وين انتو، اخوي انقتل على ايديهم،

 قالو اجت نجدة للبلد وقال اخوي بدي اطلع اشوف هاي النجدة، 
فلما طلع يتفرج ويشوف شو هي النجدة الا طلعوا عصابات الهاجانا فايتين عالبلد وانقتل في هديك الطلعة.

شفتهم لليهود وهما بيافا، كان الوضع متوتر والناس خايفه، 
كانوا اليهود اذا شافوا اشي ادامهم بهداك الوقت يقتلوه، أجو بعض الشباب يدافعوا عن يافا من المناطق المجاوره، بس أجوا متأخرين وفش معاهم سلاح كفايه، فش مقارنه بين نسبة السلاح اللي معاهم والسلاح اللي مع الهاجانا، وما كان في مجال للمقاومه المستمرة. محدش نصحنا نهاجر، ولا حدا شجعنا نطلع، اللي خلانا نطلع هو الشوفات الي كنا نشوفها، من قتل ودبح وضرب، هاي اللي خلانا نطلع، بس رموا منشورات في هداك الوقت، مكنش عنا خيارات كتيره، عشان هيك ارتعبنا وطلعنا.

اليهود اجوا علينا جوا اللد، اجوا على الدور يصيحوا، يلا على عبد الله، وطلعنا يومها مشي لقرية نعلين واليوم اللي طلعنا فيه كان برمضان في تموز، كانوا بتلاءموا ويعملوا اللي بدهم اياه، 
ضللنا خالات تنتين هناك مطلعوش وأخت كمان، وأخ مبنعرفش وين اراضيه لهلنيت، خاليت ابنها تركها تحت ومطلعهاش لانها هي مرضيتش تطلع.